Miðvikudag og fimmtudag voru þemadagar í Vallaskóla.
Þemað var afmæli Vallaskóla og blönduðust nemendur þvert á stig skólans í hópum sem fóru á milli stöðva og leystu margskonar verkefni.
Nemendur bjuggu til listaverk og sögur, lærðu um sögu skólans, bökuðu afmæliskökur, fóru í ratleiki og margt fleira en afrakstur daganna verður til sýnis á afmælishátíð skólans í dag föstudag. Gaman var að sjá hve vel gekk og allir hjálpuðust að sem gerði upplifunina margfalt skemmtilegri.
Yngri nemendur sáust svo með stjörnur í augunum fyrir eldri nemendum sem voru til fyrirmyndar og eignuðust margir nýja vini á þessum dögum.
Andinn var frábær, gleði og gaman á hverri stöð.
Allir eru sammála um að þemadagarnir gengu vonum framar og förum við öll glöð og þakklát í páskafrí.
