Sérkennsla

Sérkennsla við Vallaskóla fer fram í námsverum skólans, inni í almennum bekkjardeildum og í list- og verkgreinastofum.

Sérkennsla felur í sér verulega breytingu á námsmarkmiðum, námsefni, námsaðstæðum og/eða kennsluaðferðum miðað við það sem öðrum nemendum á sama aldri er boðið upp á.

Sérkennsla er skipulögð til lengri eða skemmri tíma eftir þörfum nemandans, jafnvel alla skólagöngu hans.

Sérkennsla einstakra nemenda eða nemendahópa fer fram innan eða utan almennra bekkjardeilda.

Nemendur, sem eiga við námsörðugleika að stríða, fá ákveðin námstilboð í sérkennslu innan þeirra marka sem sérstök tímaúthlutun þessarar kennslu leyfir. Námstilboð þessi geta eftir aðstæðum verið fólgin í styttri eða lengri afmörkuðum námskeiðum eða reglulegri kennslu allan veturinn.

Markmið kennslunnar/stuðningsins er:

að veita nemendum námstilboð sem hæfir getu þeirra og þroska,
að sinna nemendum vel í upphafi skólagöngu í forvarnarskyni,
að styðja nemendur í að fylgja námsefni bekkjarins.

Mikill þroskamunur getur verið á einstaklingum innan hvers árgangs og einnig verulegur munur á einstökum þroskaþáttum hvers barns.

Reynt er að koma til móts við þennan þroskamun ýmist með sérkennslu í litlum hópum, einstaklingskennslu eða aðstoð inni í bekk.

Leitast er við að styrkja sjálfsmynd nemandans með því að leggja áherslu á sterkar hliðar hans en jafnframt að efla þær veiku á jákvæðan hátt.

Einstaklingsnámskrá er gerð fyrir þá sem víkja verulega frá jafnöldrum í námi og fá annað námsefni. Að gerð einstaklingsnámsskrár koma alla jafna sérkennari, umsjónarkennari og foreldrar. Nemendur sem þess þurfa, að mati sérkennara/umsjónarkennara, fá prófaaðstoð.

Mál- og hreyfiþjálfun

Hreyfiþjálfun er hluti af námsefni nemanda í 1. til 3. bekk í Vallaskóla. Í 1. bekk fara allir nemendur í mál- og hreyfiþjálfun á fyrri önninni. Þau fara einnig öll í hreyfiskimun sem þroskaþjálfi og íþróttakennarar í 1. bekk sjá um. Metin er taktur, samhæfing og jafnvægi. Talsverður þroskamunur er á börnum í þessari færni og fá nemendur sem þess þurfa einn fastan tíma á viku í hreyfiþjálfun í litlum hópi. Í tímunum er farið í ýmsar æfingar sem þjálfa samhæfingu, takt, jafnvægi og boltafærni. Einnig er farið í leiki og æfingar sem miða að því að styrkja og efla málþroskann. Þjálfunin er í höndum þroskaþjálfa sem endurmetur nemendur að vori og þá er tekin ákvörðun um áframhaldandi þörf á þjálfun.

Fjölmenningardeild

Í Vallaskóla er starfrækt Fjölmenningardeild. Þar starfa þrír kennarar og deildarstjóri.

Margir tví- eða fleirtyngdir nemendur sækja tíma í fjölmenningardeild, nemendur sem eru að byrja að læra íslensku og nemendur sem eru lengra komnir. Auk íslenskukennslu fá þeir aðstoð í öðrum námsgreinum eins og við á.

Kennslan fer fram í litlum hópum og er einstaklingsmiðuð. Með kennslu í íslensku sem öðru tungumáli er stefnt að því að nemendur geti tekið fullan þátt í íslensku samfélagi. Íslenskan er lykill að svo mörgu. Hún styður ekki aðeins við móðurmál og menningu nemandans. Hún er einnig til þess fallin að styðja hann til þátttöku í hinu nýju samfélagi, auðga það og styrkja.

Nemendateymi

Hugmyndafræðin um nemendateymi innan Vallaskóla á rætur sínar að rekja til teymisvinnu í yngri deild skólans. Skólaárið 2008-2009 þróaðist þessi hugmyndafræði enn frekar þegar vinna með nemendateymi í eldri deild skólans hófst.

Verklagsreglur:

Markmið: Að þjónusta við nemendur með náms-, félags- og/eða hegðunarerfiðleika sé skilvirkari og utanumhald mála verði öruggara. Að ábyrgð á málum sé dreifðari.

Hvert nemandateymi samanstendur a.m.k. af: Einum skólastjórnanda, einum kennara (getur verið sérkennari), einum ráðgjafa (sálfræðingi, námsráðgjafa eða öðrum sem við á) og foreldrum nemandans. Teymið starfar eitt skólaár í senn.

Skólastjórnandi er formaður teymis. Hann er fundarstjóri og boðar til fundanna og ritar fundargerð á þar til gerð eyðublöð. Hann heldur einnig utan um skráningu upplýsinga í Mentordagbók. Hann sér um að fundargerðir og aðrar viðeigandi upplýsingar úr Mentor séu til staðar í trúnaðarmöppu nemandans.

Fundir ársins: Einn stöðufundur, einn upplýsingafundur, eftirfylgnifundir og einn lokamatsfundur. Gert er ráð fyrir að fundir séu stuttir og markvissir.

Stöðufundur: Hann er haldinn án foreldra. Tíminn er c.a. 45 mínútur. Þar er farið yfir greiningar og staða nemandans metin í náms- og félagslegu tilliti (hegðun, líðan, atferli, nám og tengsl). Gott er að kalla eftir upplýsingum frá sem flestum er að nemandanum koma fyrir fundinn. Upplýsingar um nemandann eru samræmdar og gerð úttekt á þeirri aðstoð sem nemandinn fær í skóla (er verið að beita réttum aðferðum í þeirri aðstoð sem boðið er upp á og er upplýsingaflæði í lagi?). Formaður teymis skráir stutta fundargerð og upplýsingar um fundinn í Mentordagbók. Fundarmenn skrifa undir fundargerð.
Upplýsingafundur: Allt teymið kemur saman í c.a. 30 mínútur, einnig foreldrar. Upplýsingar um nemandann eru samræmdar sem og aðgerðir heima og í skóla. Leggja skal áherslu á jákvæða og góða samvinnu. Verið sé að leita lausna um fram allt annað. Teymið setur sér markmið um hvaða árangri skal náð fyrir fyrsta eftirfylgnifund. Formaður teymis skráir stutta fundargerð og upplýsingar um fundinn í Mentordagbók og dagsetur fyrsta eftirfylgnifund. Fundarmenn skrifa undir fundargerð.
Eftirfylgnifundur: Allt kemur saman í 30 mínútur a.m.k. einu sinni á önn. Staðan metin og markmið endurskoðuð. Dagsetja skal næsta eftirfylgnifund í lok fundar. Formaður teymis skráir stutta fundargerð og upplýsingar um fundinn í Mentordagbók. Fundarmenn skrifa undir fundargerð.
Lokamatsfundur: Halda skal þennan fund í skólalok og allt teymið kemur saman. Fundartími má ekki fara yfir 45 mínútur. Á þessum fundi er árangur vetrarins metinn og veikleikar og styrkleikar skoðaðir, eins konar uppgjör eftir veturinn. Teymið skoðar nemandans fyrir sumarið og leggur línurnar fyrir næsta haust. Formaður teymis skráir stutta fundargerð og upplýsingar um fundinn í Mentordagbók. Fundarmenn skrifa undir fundargerð.