Einelti

Meginstoðir í forvarnahlutanum eru eftirfarandi:

• Skólasamfélagið allt tekur eindregna afstöðu gegn einelti með markvissri umfjöllun og fræðslu um eyðileggingarmátt eineltis og birtingarmynd þess. Umfjöllunin fer fram á meðal nemenda, starfsfólks skólans og tengdra stofnana, foreldra, skólaráðs og í þeim miðlum sem Vallaskóli hefur yfir að ráða.
• Það er skylda skólasamfélagsins að skapa andrúmsloft þar sem einelti er ekki liðið. Í því felst hlýlegur og jákvæður áhugi hinna fullorðnu, rammi sem tekur á óviðunandi atferli, stefnuföst beiting agastjórnunar án líkamlegrar eða óvinveittrar íhlutunar og viðurkenning á valdi hinna fullorðnu, sem yfirboðara, við ákveðnar aðstæður. Leiðarljósin í Vallaskóla eru: Agi, lausnir og umhyggja.
• Þekking á eineltishringnum er öllum í skólasamfélaginu mikilvæg. Um eineltishringinn er fjallað í foreldrabæklingi Olweusaráætlunarinnar og í handbók starfsmanna. Eineltishringurinn hangir uppi í öllum kennslustofum og er hann reglulega til umfjöllunar meðal kennara og nemenda.
• Í hverjum bekk skal umsjónarkennari halda bekkjarfundi u.þ.b. hálfsmánaðarlega. Á slíkum fundum er m.a. fjallað um mikilvægi þess að halda uppi jákvæðum skólabrag. Góður skólabragur einkennist m.a. af umburðarlyndi, virðingu, samkennd og lífsgleði. Gildi Vallaskóla eru: Virðing, þekking, lífsgleði. Höfðað er til ábyrgðar nemenda gagnvart eineltishegðun með því að hver bekkur setur sér bekkjarreglur er varða dagleg samskipti. Ein af reglunum skal miðast við að tekin sé afstaða gegn einelti.
• Gott upplýsingaflæði milli nemenda, starfsmanna skólans og tengdra stofnana annars vegar og heimili og skóla hins vegar skiptir afar miklu máli í því að sporna við eineltishegðun og að leysa eineltismál. Nemendur eru hvattir til að segja frá minnsta grun um eineltishegðun. Því fyrr sem slíkt gerist því fyrr næst að uppræta einelti. Það sama gildir um foreldra enda má leiða líkur að því að þolandi eineltis sýni fyrstu merki um vanlíðan heima fyrir.
• Eftirlit og gæsla er stór þáttur í því að fyrirbyggja einelti. Skipulagt eftirlit er með nemendum í frímínútum og hádegishléi, inni í skólanum og á skólalóð. Starfsmenn á skólalóð eru í endurskinsvestum. Eftirlitið nær einnig til búningsherbergja íþróttahúss og sundlaugar. Starfsmenn skólans og íþróttamannvirkja sjá um eftirlitið.
• Á hverju hausti er lögð fyrir nafnlaus könnun (Olweusarkönnunn) þar sem umfang eineltis í skólanum er kannað. Könnunin er á rafrænu formi og unnin í samstarfi við framkvæmdastjóra Olweusaráætlunarinnar á Íslandi. Niðurstöður könnunarinnar eru kynntar öllum í skólasamfélaginu og brugðist er við í samræmi við þær.
• Starfsfólk Vallaskóla hittist á reglulegum fundum á hverju skólaári þar sem fjallað er um einelti og bestu leiðirnar til að hindra slíka hegðun. Fundirnir gegna líka hlutverki upprifjunar á meginatriðum aðgerðaráætlunarinnar. Á hverju ári má búast við að nýir starfsmenn og nemendur bætist í hópinn og því er mikilvægt að halda aðgerðaráætluninni við með reglubundnum hætti.
• Eineltisteymi Vallaskóla er skipað 4-6 lykilstarfsmönnum (verkefnisstjóri Olweusar, deildarstjórar, námsráðgjafar og hjúkrunarfræðingur) og eru þeir einnig starfsmenn Lausnateymis Vallaskóla. Lausnateymi Vallaskóla fundar einu sinni í viku og helstu verkefni þess hvað varðar áætlun gegn einelti í skólanum eru: Að vinna að forvörnum, samræma og varðveita upplýsingar um eineltismál, bregðast við ábendingum um einelti og fylgja aðgerðum eftir.
• Skólaráð Vallaskóla gegnir hlutverki stýrihóps aðgerðaráætlunarinnar.
• Notkun agastjórnunartækis Vallaskóla, Uppeldisstefnu Vallaskóla, og beiting atferlisþjálfunar ART gegnir mikilvægu hlutverki í aðgerðaráætlun gegn einelti, bæði í vinnu með forvarnir og í vettvangsaðgerðum. ART og Uppeldisstefna Vallaskóla styðja vel við hugmyndafræði Olweusar, og öfugt.