Skólareglur Vallaskóla

Í Vallaskóla grundvallast samskipti á virðingu, kurteisi og tillitsemi. Allir eiga rétt á vinnufriði.

1. Í Vallaskóla er námið stundað af kostgæfni. Við mætum stundvíslega í allar kennslustundir, vel undirbúin og með öll námsgögn meðferðis.

2. Góð umgengni er í hávegum höfð í Vallaskóla. Við göngum öll þrifalega um og berum virðingu fyrir eigum skólans og hvers annars. Við röðum skóm, göngum frá útifatnaði og hirðum vel um námsbækur og önnur gögn.

3. Í Vallaskóla stýra kennarar vinnu nemenda í kennslustundum og nemendur fara að fyrirmælum þeirra og annars starfsfólks skólans á skólatíma.

4. Í Vallaskóla er lögð áhersla á heilbrigði og hollar lífsvenjur. Hollt nesti er öllum mikilvægt. Neysla gosdrykkja og sælgætis er ekki leyfð. Neysla tóbaks og vímuefna er bönnuð.

5. Ætlast er til þess að nemendur séu á skólalóðinni á skólatíma. Nemendur eru á ábyrgð foreldra/forráðamanna utan skólalóðar, bæði á leið úr og í skóla og einnig ef þeir yfirgefa skólalóð á skólatíma.

6. Í skólanum nota nemendur engin þau tæki og tól sem valda truflunum og óþægindum. Notkun síma, geislaspilara og annarra hljómtækja er óheimil í kennslustundum nema með leyfi kennara. (Reiðhjól, línuskautar, hjólabretti og vélhjól eru ekki notuð á skólatíma).

7. Nemendur bera sjálfir ábyrgð á verðmætum sem þeir koma með í skólann.

8. Yfirhafnir, húfur, skór og annar útivistarfatnaður er ekki notaður í kennslustundum innandyra.

9. Í ferðalögum og á skemmtunum á vegum skólans eru allar reglur skólans í fullu gildi, nema annað sé tekið fram.

Viðurlög við brotum á skólareglum

,,Foreldrar/forráðamenn bera frumábyrgð á uppeldi barna sinna. Á þeim hvílir sú skylda að börnin sæki skóla og að þau séu eins mótttækileg fyrir þeirri menntun sem skólinn annast og framast er unnt.” (Aðalnámskrá grunnskóla, almennur hluti, bls. 44).

Innan skólans er stöðugt unnið að því að bæta aga og auka aðhald í öllu starfi með það að markmiði að skólastarfið gangi snurðulaust fyrir sig. Skólinn lítur svo á að það sé sameiginlegt verkefni skólans og foreldra/forráðamanna að standa vel að því málefni. Ávallt skal tilkynna foreldrum/forráðamönnum ef beita þarf viðurlögum við skólareglum.

Lögmæt forföll skulu tilkynnt af forráðamanni nemenda til skrifstofu skólans til skráningar svo fljótt sem verða má. Ef skriflegra vottorða er krafist eru þau gild frá forráðamanni eða lækni. Tilkynningar um forföll nemenda eiga að jafnaði að berast skólanum samdægurs, ekki mörgum dögum síðar. Gleymi foreldri að tilkynna veikindi barns, en gerir það síðar þegar barnið hefur fengið fjarvist og óskar eftir leiðréttingu, gildir að jafnaði sú regla að komi tilkynning of seint, er barnið skráð með fjarvist. Umsjónarkennari metur aðstæður og ákveður hvort leiðréttinga er þörf.

Brottrekstur:

Við alvarleg og/eða ítrekuð brot á skólareglum getur þurft að grípa til tímabundinnar brottvísunar úr skóla, brottvísunar úr einstökum greinum eða brottvísunar um lengri tíma. Um brottvísun úr einstökum greinum eða brottvísunar í lengri tíma en nemur einum skóladegi gilda ákvæði stjórnsýslulaga.

Vinnureglur við beitingu viðurlaga

Viðurlög miðast fyrst og fremst við það að þau hjálpi nemandanum að bæta hegðun sína eða stöðu, eins og segir um í reglugerð um skólareglur nr. 270/2000, en þar segir orðrétt í 6. grein:

,,Nýta skal til fullnustu allar þær leiðir sem skólinn ræður yfir til að leita lausna og ráða bót á hegðun nemanda. Leita þarf allra mögulegra orsaka innan skólans til að viðurlög verði bæði markviss og komi nemandanum að gagni við að bæta hegðun sína.”

Vinnureglur

Umsjónarkennari ber ábyrgð á og fylgist með því að umsjónarnemendur hans hlíti þeim viðurlögum sem ákveðin hafa verið. Brot á skólareglum verða skráð í Mentor. Viðurlög við skólareglum eiga við nemendur í 6. – 10. bekk. Foreldrar nemenda í 1. – 5. bekk eru látnir vita ef þeir gerast brotlegir við skólareglur. Mismunandi vinnureglur gilda eftir því hvaða regla er brotin.

Regla 1 – Ástundun.

Ef nemandi fellur í skólasóknareinkunn úr 10.00 vegna þess að mæting og ástundun er ábótavant er nemanda gefin kostur á því að bæta þar úr. Undirritaður er sérstakur samningur vegna þessa. Sjá nánar umfjöllun um skólasóknareinkun.

Regla 2 – Umgengni .

Ef nemandi er uppvís að slæmri umgengni eða sóðaskap þarf hann þrífa eftir sig.
Ef nemandi veldur viljandi skemmdum á eignum skólans eða annarra má hann búast við því að þurfa að bæta skaðann.

Regla 3 – Verkstjórn starfsfólks.

Við fyrsta brot fær nemandi tiltal. (Tiltal er ekki skráð)
Láti nemandi sér ekki segjast er hann áminntur og skráður í Mentor.
Láti nemandi sér enn ekki segjast er honum vísað úr tíma eða af vettvangi og foreldrum gert viðvart af viðkomandi kennara. Kennari tilkynni skrifstofu skólans að hann hyggist vísa nemanda úr tíma. Nemanda er ávallt vísað á skrifstofu skólans.
Virði nemandinn regluna alls ekki þrátt fyrir ofangreind þrep er honum vísað til skólastjórnenda sem ákveða frekari aðgerðir og foreldrum gert viðvart.

Regla 4 – Heilbrigði og hollar lífsvenjur .

Ef nemandi verður uppvís að reykingum eða neyslu áfengis eða annarra vímuefna þarf viðkomandi að sækja fræðslu um vímuvarnir til skólahjúkrunarfræðings. Einnig má nemandinn eiga von á því að vera vísað úr skóla það sem eftir lifir skóladags.
Gosdrykkir og sætindi eru gerð upptæk hjá nemanda á skólatíma, nema fyrir liggi sérstakt leyfi frá skólanum.

Regla 5 – Fjarvera frá skólalóð á skólatíma

Treyst er á samvinnu við foreldra um að leysa einstök mál.
Ef yngri nemendur (í 1. – 5. bekk) fara af skólalóð í leyfisleysi eru foreldrar barna tafarlaust látnir vita.

Regla 6 – Tæki og tól sem valda truflunum

Ef nemendur verða uppvísir að notkun hverra þeirra tækja eða tóla sem valda truflun á kennslu eða öðru starfi skólans, utan eða innan veggja kennslustofunnar, eru öll slík tæki eða tól gerð upptæk. Nemendur fá þau ekki afhent, heldur verða foreldrar/forráðamenn að sækja þau til skólastjórnenda. (sjá einnig reglur um notkun GSM-síma).
Neiti nemandi að verða við reglunni, kemur til reglu 3.

Regla 7 – Verðmæti í skóla

Nemendur bera ábyrgð á þeim verðmætum sem þeir kjósa að koma með í skólann og skólinn bætir ekki tjón á þeim verðmætum.

Regla 8 – Útivistarfatnaður

Ef nemendur koma í útifatnaði inn í kennslustundir er þeim gert að fara og setja hann á viðeigandi staði, á hanka, í skógeymslu, o.s.frv.
Ef nemandi neitar kemur til reglu 3.
Aðrir en kennarar komi upplýsingum um brot til umsjónarkennara svo þeir geti skráð brotið.
Við alvarleg og ítrekuð brot á skólareglum getur þurft að grípa til tímabundinnar brottvísunar úr skóla, brottvísunar úr einstökum greinum eða brottvísunar um lengri tíma. Um brottvísun úr einstökum greinum eða brottvísunar í lengri tíma en nemur einum skóladegi gilda ákvæði stjórnsýslulaga.
Þar sem viðbrögð við brotum á agareglum eru samvinnuverkefni foreldra/forráðamanna og skóla væntir Vallaskóli þess að foreldrar/forráðamenn verði í góðu samstarfi með að framfylgja skólareglum og viðurlögum við þeim.

Reglur um farsímanotkun nemenda

Nemendur í 1.-7. bekk mega ekki nota síma í skólanum og á skólatíma, hvorki í kennslustund eða á opnum svæðum nema að undangengnu leyfi starfsmanns skólans. Tækin skulu geymd í skólatösku.
Sama gildir í vettvangsferðum og skólaferðalögum

Nemendur í 8.-10. bekk mega ekki nota síma í kennslustundum nema með leyfi starfsmanns skólans. Notkun síma í opnum rýmum fer eftir því hvort um er að ræða tækjalaus svæði eða ekki.
Sama gildir í vettvangsferðum og skólaferðalögum

Símar eru á ábyrgð nemenda í skólanum og á skólatíma. Tjón vegna þjófnaðar eða skemmda verður ekki bætt af hálfu skólans. Við brot á þessum reglum skal nemandi slökkva á síma sínum og afhenda hann starfsmanni umyrðalaust. Nemandi getur fengið símann aftur þegar skóladegi er lokið.

Skólasókn

Í grunnskólalögum kemur fram að foreldrar beri ábyrgð á uppeldi barna sinna og á því að þau innritist í skóla og sæki skóla. Jafnfram er mikilvægt að hafa í huga að menntun og velferð nemenda er sameiginlegt verkefni heimila og skóla og samstarfið þarf að byggjast á gagnkvæmri virðingu, trausti og upplýsingamiðlun beggja aðila, sameiginlegum ákvörðunum og samábyrgð.

Útskriftarreglur

Heimild til útskriftar áður en 10 ára skólagöngu lýkur byggir á 32. gr. laga um grunnskóla nr. 91 frá 2008 og ákvæðum aðalnámskrár grunnskóla frá 2006.

Í 32. gr. laga um grunnskóla nr. 91 frá 2008 segir m.a.

,,Skólastjóri metur hvort nemandi hafi lokið grunnskólanámi og ber ábyrgð á útskrift hans úr grunnskóla. Heimilt er að útskrifa nemanda úr grunnskóla áður en tíu ára skyldunámi er lokið, enda uppfylli nemandi námskröfur grunnskóla í samræmi við lokamarkmið aðalnámskrár.”

Í aðalnámskrá grunnskóla frá 2006 segir:

,,Grunnskólanemendum sem hafa til þess námsgetu og þess óska er mögulegt að ljúka grunnskóla á skemmri tíma en tíu árum.” (Aðalnámskrá grunnskóla, bls. 7)

Grunnskólalög heimila einnig að nemandi ljúki öllu námi grunnskóla á skemmri tíma en tíu árum. Hér er átt við að mjög dugmiklir nemendur geti útskrifast úr grunnskóla einu eða jafnvel tveimur árum fyrr en aldur þeirra segir til um. Eðlilegt er að leggja það í hendur skólans með aðstoð sérfræðiþjónustu skóla og að fengnu samþykki foreldra og forráðamanna að meta hvenær og hvernig flýting af þessu tagi fer fram. (Aðalnámskrá grunnskóla, bls. 24)

Á grundvelli ofangreindra ákvæða geta foreldrar og forráðamenn nemenda Barnaskólans á Eyrarbakka og Stokkseyri sótt um að nemandi útskrifist úr grunnskóla við lok 9. bekkjar. Einnig geta nemendur 10. bekkjar útskrifast um áramót. Skólinn hefur mótað sér verklagsreglur, í samræmi við samskonar verklagsreglur í öðrum grunnskólum Árborgar. Reglurnar taka til ákvörðunar, mats og útskriftar nemenda úr Barnaskólanum á Eyrarbakka og Stokkseyri við lok 9. bekkjar og eftir níu og hálfs árs grunnskólagöngu.

Verklagsreglur vegna útskriftar 10. bekkinga um áramót

Heimilt er að útskrifa nemanda úr grunnskóla áður en 10 ára skyldunámi er lokið, ef nemandi uppfyllir námskröfur grunnskóla í samræmi við lokamarkmið aðalnámskrár. (Lög um grunnskóla 2008 ) Nemanda ber því að ljúka öllu skyldunámi samkvæmt aðalnámskrá grunnskóla áður en hann útskrifast þaðan. ( Aðalnámskrá Grunnskóla 2010)

– Námsefni 10.bekkjar skal lagt til grundvallar en tekið tillit til þess að nemendur lesa hluta þess utanskóla.

– Eftirtaldar námsgreinar skulu lagðar til grundvallar: Íslenska, stærðfræði, enska, danska, náttúrufræði og samfélagsfræði.

– Nemandi skal ná einkunninni 8,5 í Íslensku, stærðfræði og ensku á sérstökum “lokaprófum” sem fram fara í desember og hafi náð 7 í meðaleinkunn í hinum greinunum. Kennara viðkomandi námsgreina er þó í sjálfsvald sett að taka tillit til útkomu úr samræmdum prófum og haustannaprófum, við ákvörðun á lokaeinkunn.

– Nemandi skal hafa lokið 10. bekkjar sundprófi.

– Ástundun og frammistaða í öðrum námsgreinum skal vera ásættanleg.

– Nemanda stendur til boða félagsþroskamat hjá sálfræðingi skólans, óski forráðamenn þess.

– Nemandi sem hyggst útskrifast um áramót út 10.bekk skal tilkynna um þá ósk í upphafi vorannar í 9. bekk.

Forföll

Foreldrar þurfa að tilkynna allar breytingar á skólasókn barns síns.

Tilkynna skal veikindi að morgni hvers dags sem nemandi er veikur. Gleymi foreldri að tilkynna veikindi barns, en gerir það síðar þegar barnið hefur fengið fjarvist og óskar eftir leiðréttingu, gildir að jafnaði sú regla að komi tilkynning of seint þá er barnið skráð með fjarvist. Umsjónarkennari metur aðstæður og ákveður hvort leiðréttinga er þörf.

Um leyfi sækja foreldrar til umsjónarkennara eða skólastjóra. Á skrifstofum skólans er óskum um skemmri leyfi nemenda svarað. Óskir um lengri en tveggja daga leyfi þurfa að berast skólastjóra eða aðstoðarskólastjóra á þar til gerðum eyðublöðum.

Að gefnu tilefni skal foreldrum bent á að reyna að stilla óskum um leyfi í hóf því mörgum reynist erfitt að vinna upp það sem tapast. Sumar óskir um leyfi eru líka þess eðlis að hægur vandi er að sinna þeim erindum utan skólatíma.

Í nýrri Aðalnámskrá grunnskóla – almennum hluta segir: ,,Sæki forráðamaður skólaskylds barns um tímabundna undanþágu þess frá skólasókn, er skólastjóra heimilt að veita slíka undanþágu. Forráðamaður skal þá sjá til þess að nemandinn vinni upp það sem hann kann að missa úr í námi meðan á undanþágutímanum stendur.” (Aðalnámskrá grunnskóla – almennur hluti, bls. 51)

Forfallakennsla
Forfallist kennari er reynt að fá annan kennara til að hlaupa í skarðið. Forföll leiða alltaf til röskunar á skólastarfi en leitast er við að láta viðverutíma barnanna halda sér. Í eldri bekkjum getur þó sú staða komið upp að nemendur verði sendir heim ef kennara vantar.

Mætingarreglur

Ástundunareinkunn

Nemendur byrja með skólasóknareinkunnina 10,0 við upphaf skólaárs. Óheimilar fjarvistir, óstundvísi, brottvísun úr tíma og vöntun á námsgögnum gefa ákveðinn fjölda punkta sem segir til um skólasóknareinkunn við lok skólaárs. Skólasóknareinkunn miðast við skólaárið í heild sinni og er einkunnastaðan gefin nemanda í lok hverrar annar.

Fjarvist. Óheimil fjarvist nemanda í tíma gefur 3 punkta.
Seint. Komi nemandi til kennslustofu á eftir kennara telst hann seinn og fær 1 punkt.
Skróp. Komi nemandi 15 mínútum of seint fær nemandinn skróp og 2 punkta.
Brottvísun. Skapist það ástand að vísa þurfi nemanda úr kennslustund fær hann 4 punkta.
Námsgögn vantar. Mæti nemandi án námsgagna fær hann 1 punkt.

Skráning, eftirlit og viðbrögð

Allir forráðamenn nemenda fá sent vikulega í tölvupósti yfirlit yfir mætingar nemandans og skólasóknareinkunn hans. Ef nemandi er uppvís að fjarvist, að koma of seint, að skrópa, honum hafi verið vísað úr kennslustund eða hann ekki mætt með námsgögnin skráir kennari það samdægurs í Mentor. Ef nemanda vantar í upphafi kennslustundar hringir kennari í ritara úr stofu sinni og grennslast fyrir um stöðu mála. Ritari hefur síðan eins fljótt og auðið er samband við foreldra ef ekki liggja fyrir eðlilegar skýringar á fjarveru nemandans. Umsjónarkennari fylgist með ástundun nemenda sinna og hefur samskipti við foreldra eins og þörf krefur.

Nemandi (5.-10. bekkur) getur einu sinni á hvorri önn, tvisvar sinnum á hverju skólaári, sótt um að hækka skólasóknareinkunn sína. Nemandi og foreldri sækja um slíkt til umsjónarkennara. Gerður er skriflegur samningur í viðtalstíma umsjónarkennara milli nemanda, foreldra og umsjónarkennara.